El 24 de xunetu de 2006, rindióse un homenaxe a la Emigración Llangreana na figura los 16 llangreanos que presiden o presidieron otros tantos Centros Asturianos espardíos pel mundu.

    Los homenaxaos tuvieron acompangaos por representantes de los Centros Asturianos; la Presidenta la Xunta del Principáu; el Conseyeru de Xusticia, Seguridá Pública y Rellaciones Esteriores; los Directores de l'Axencia Asturiana de la Emigración , de l'Asturiana de Cooperación y de Rellaciones Institucionales, y los vicepresidentes del Conseyu de Comunidaes Asturianes y de la Federación Internacional de Centros Asturianos. Esti homenaxe tvo llugar nuna recepción oficial que se celebró na nuestra Casa'l Conceyu y que ficieron l'Alcaldesa y los miembros de la Corporación.
   La Comisión Xestora, formábenla l'Ayuntamientu de Llangréu , La Sociedá de Cultura y Deportes " LA MONTERA ", La Sociedá de Festexos "Santiago Apóstol" y el Centru Asturianu de Málaga.
    Contóse cola collaboración desinteresada del Laureado Coro Santiaguín y la Banda Gaites Conceyu de Llangréu.
    L'éxitu del actu afaló que buscáremos repetir tolos años un alcuentru colos llangreanos y llangreanes que tán fuera'l conceyu, polo que surdió la idea de crear una ASOCIACIÓN que los axuntara. Esto consideróse posible utilizando les nueves tecnoloxíes de la comunicación (internet), polo que se decidió creala y pone-y nome:
    Darréu d'ello, rexistráronse los sos estatutos nel Rexistru Nacional d'Asociaciones con fecha 5/9/2006, n u . 587691 y nel Rexistru d'Asociaciones del Ayuntamientu de Llangréu, coles sos señes sociales fuera d'Asturies pa poder solicitar, nel momentu amañosu, el RECONOCIMIENTU D'ASTURIANÍA, que según marca la Llei d'Asturianía solo se concede a les Comunidaes nel esterior.
    L'Acta Fundacional firmáronla los Presidentes del Centru Asturianu de Bruxeles, de Montreux (Suiza) y de Málaga, que formaron la Xunta Xestora hasta que, nel primer alcuentru en xunetu 2007, na celebración de la primer Asamblea Xeneral, nomóse una Xunta Directiva.
     Pa pertenecer a l'asociación solo se necesita ser llangreanu o llangreana de nacimientu o d'adopción. Ente otres coses, búscase consiguir les referencies que nos permitan disponer del PATRIMONIU HUMANU DE LLANGRÉU nel esterior.
    La Corporación del nuestru Ayuntamientu apoyó la iniciativa y va ser el nuestru referente en Llangréu.

Acta Fundacional

    En Sama a ventisiete de xunetu de dos mil seis, aconceyen:

• Dionisio Fernández Díaz , DNI 10485559-C de nacionalidá española, con señes en Cai La Nalona , 18 – 2 u - D de Sama (Asturies)
• José Antonio Blanco Ortiz , DNI 10489671-S de nacionalidá española, con señes en: Cai Puerto Payares, 8-3 u -D, d'Uviéu (Asturies) y
• Florentino Martínez Roces , DNI 10 405 944 P, con nacionalidá española y señes en C/ Blas de Lezo, 4-4 u A. (29011) MÁLAGA.
  
  Y d'acuerdu cola Llei Orgánica 1/2002 de 22 de marzu reguladora del Drechu d'Asociación, ACUERDEN:

     Fundar una asociación SIN ÁNIMU DE PROVECHU ECONÓMICU cola DENOMINACIÓN DE “LANGREANOS EN EL MUNDO”, que va funcionar mandándose polos estatutos que siguen y va tener como órganos provisionales de gobiernu a:
      
       PRESIDENTE: Florentino Martínez Roces
       SECRETARIU XENERAL: Dionisio Fernández Díaz
       VOCAL: José Antonio Blanco Ortiz

     Autorízase a Florentino Martínez Roces pa solicitar la inscripción nel Rexistru d'Asociaciones .

Estatutos de l'Asociación
"Langreanos en el mundo"

(Renovaos el 17 de xunetu de 2008)

ÍNDIZ

TÍTULU PRIMERU: Constitución, oxetu, señes, ámbitu y personalidá xurídica.

TÍTULU SEGUNDU: Los asociaos.

TÍTULU TERCERO: Órganos de gobiernu y representación.

TÍTULU CUARTU:  Escoyeta de los órganos de gobiernu.

TÍTULU QUINTU: Patrimoniu y réxime d'Alministración.

TÍTULU SESTU:  Disposiciones finales.

TÍTULU PRIMERU   Constitución, oxetu, señes, ámbitu y personalidá xurídica.

ARTÍCULU 1 u .- LANGREANOS EN EL MUNDO, créase d'acuerdu col ACTA FUNDACIONAL SUSCRITA EL 27 DE XUNETU DE DOS MIL SEIS, y va mandase conforme a lo qu'establez la Llei Orgánica 1/2002, de 22 de marzu, que regula'l drechu d'asociación.

ARTÍCULU 2 u .- L'asociación ye de naturaleza privada, con funcionamientu democráticu, sin ánimu de provechu económicu y tien como fines primordiales, el fomentu y práctica de tou tipu d'actividaes: culturales, recreatives, sociales, vecinales, deportives y económiques que sirvan de soporte a los llazos d'unión, convivencia y desarrollu ente los sos socios y socies y el Conceyu de Llangréu (Asturies) y otres sociedaes socio-culturales llangreanes.

ARTÍCULU 3 u .- Van ser oxetu d'especial atención los valores tradicionales asturianos y el mantenimientu de llazos culturales, sociales y económicos con Asturies y toles Comunidaes Asturianes d'España y d'otros países onde tean asitiaes, afalando la incorporación de los socios a estes Comunidaes Asturianes, amás de les organizaciones empresariales, l'alministración del Principáu y fundamentalmente cola alministración del Ayuntamientu de Llangréu afalando iniciatives pa l'ameyoramientu del conceyu. Tamién se consideren oxetu d'especial atención la promoción de los drechos humanos, el fomentu de la igualdá d'oportunidaes y la tolerancia y el fomentu de la economía social.

ARTÍCULU 4 u .- Les señes llegales pa l'Asociación LANGREANOS EN EL MUNDO, son les que siguen: cai Blas de Lezo, 4,4 u A, Distritu Postal 29011. Málaga.

Les sos actividaes van desenvolvese principalmente na Comunidá del Principáu d'Asturies, pudiendo celebrar actividaes nos llugares onde tean residiendo los asociaos y asociaes llangreanos, principal oxetivu d'esta asociación.

ARTÍCULU 5 u .- LANGREANOS EN EL MUNDO, tien personalidá xurídica propia y, al traviés de los sos representantes llexítimos, pue realizar les operaciones, contratos y actos xurídicos que considere oportunos pa consiguir los sos fines o pa defender los sos intereses.

ARTÍCULU 6 u .- La duración de l'asociación nun tien llende temporal y va mandase y alministrase por un presidente y la so Xunta Directiva. La escoyeta y atribuciones d'éstos regúlense nos presentes estatutos.

ARTÍCULU 7 u .- Queda espresamente definida como ayena a los sos fines toa actividá política de carácter partidista, lo mesmo que cualquier manifestación o espresión qu'atente contra'l prestixu o honorabilidá de l'asociación.

TÍTULU SEGUNDU    Los asociaos

CAPÍTULU I.- CLASIFICACIÓN

LOS ASOCIAOS

Nestos estatutos s'aplica la palabra ASOCIÁU indistintamente al xéneru masculín y al femenín.

ARTÍCULU 8.- L'asociación LANGREANOS EN EL MUNDO, compónenla les clases d'asociaos que siguen:
TITULARES , FUNDADORES , Y D'HONOR

ARTÍCULU 9.- ASOCIÁU TITULAR . Asociaos titulares son aquellos que teniendo solicitao voluntariamente'l so ingresu na asociación y previo los trámites que pa l'almisión tean en vigor, d'acuerdu coles normes reglamentaries aprobaes pola Xunta Xeneral, seyan almitíos pola Xunta Directiva. Estos van tener tolos drechos y obligaciones que s'establecen nos presentes estatutos y los que puedan aprobase reglamentariamente nel futuru.

ARTÍCULU 10.- ASOCIÁU FUNDADOR .- Aquellos que soscribieron l'acta fundacional de l'asociación que van poseyer esti drechu hasta la so estinción por vía natural.

ARTÍCULU 11.- ASOCIAOS D'HONOR .- Aquelles persones físiques o xurídiques pertenecientes o non a l'asociación que polos sos servicios relevantes a favor de la mesma, o polos sos méritos personales, seyan propuestos pola Xunta Directiva y s'apruebe en Xunta Xeneral.

ARTÍCULU 12.- CONDICIONES D'INSCRIPCIÓN COMO ASOCIÁU.
La Xunta Directiva, va almitir como asociáu a toa persona que lo solicite y tea d'acuerdu con acatar los estatutos, sacante casos escepcionales dafechamente xustificaos.
La Xunta Directiva va presentar a la Xunta Xeneral, na so xunta añal, les piticiones d'inscripción que se nun s'aceptaren amás de la so xustificación. La Xunta Xeneral va poder anular la decisión de la Xunta Directiva

ARTÍCULU 13.- La Xunta Directiva, cuando lo considere oportuno, va establecer una cuota que tendrá de someter a la Xunta Xeneral pa la so aprobación.

CAPÍTULU II.- DERECHOS Y OBLIGACIONES

ARTÍCULU 14.-

• A) Van tener voz y votu nes Xuntas Xenerales los socios y socies mayores de 18 años con un añu d'antigüedá.
• B) Usar los distintivos y emblemes de l'Asociación nel marcu establecíu por estos Estatutos y la llexislación que tea en vigor nel llugar de la utilización.
• C) Ser elector y poder ser escoyío nes condiciones que determinen estos Estatutos.
• D) Nun va tener drechu a votu l'asociáu qu'ocupe dalgún cargu recompensáu con perres pola asociación.
• E) Tolos asociaos van tener accesu a los llibros de l'asociación previa notificación dirixida al presidente. El presidente y la Xunta Directiva van disponer de 45 díes pa responder a la pitición.

ARTÍCULU 15.-
Los asociaos d'honor y los fundadores que perdieren la condición de titulares, van poder participar nes sesiones de la Xunta Xeneral con voz, pero sin votu.

ARTÍCULU 16.-OBLIGACIONES DE LOS ASOCIAOS

1. Tolos asociaos tienen el deber inescusable de cumplir les normes conteníes nos presentes Estatutos y toles que puedan tar incluyíes nel Reglamentu de Réxime Interior, amás de les que procedan de la Xunta Directiva.
2. Contribuir al presupuestu de l'asociación abonando puntualmente la cuota ordinaria llegalmente establecida o cualquiera otra que pueda establecer la Xunta Xeneral.
3. Acatar los acuerdos de la Xunta Xeneral y los llegalmente establecíos polos órganos de gobiernu de l'asociación.
4. Comunicar cualquier variación de los sos datos personales, necesarios pal funcionamientu de l'asociación.

CAPÍTULU III.- PERDA DE CONDICIÓN D'ASOCIÁU.

ARTÍCULU 17.- LA CONDICIÓN D'ASOCIÁU VA PERDESE POR

a).- Estinción de l'asociación.
b).- Muerte del asociáu
c).- Por impagu sin causa xustificada de les cuotes sociales, ordinaries o estraordinaries, derrames y otros desembolsos aprobaos en Xunta Xeneral, con más de tres meses de retrasu. La comunicación de baxa al interesáu, ha facese de forma evidente. La realmisión en tal supuestu va ser facultá discrecional de la Xunta Directiva y va poder recuperase l'alta abonando los meses en situación de baxa.
d).- por baxa voluntaria.
e).- La Xunta Directiva va poder retirar la condición d'asociáu a toa persona que nun respete les obligaciones establecíes nel Artículu 16 d'estos Estatutos. La Xunta Directiva presentará a la Xunta Xeneral una rellación de les persones que perdieren d'esta manera la so condición d'asociaos dende la última xunta de la Xunta Xeneral. La Xunta Xeneral pue anular la decisión nesti sentíu de la Xunta Directiva. Nesi casu, los asociaos espulsaos tendrán drechu a esplicar el so puntu de vista ante la Xunta Xeneral. Tou asociáu podrá renunciar a la so condición de sociu por carta dirixida al Presidente o a aquel miembru de la Xunta Directiva qu'esti designe.

TÍTULU TERCERU    Órganos de gobiernu y representación

Los órganos de gobiernu y representación de l'asociación son:

1. LA XUNTA XENERAL
2. EL PRESIDENTE
3. LA XUNTA DIRECTIVA

CAPÍTULU I.- XUNTA XENERAL

ARTÍCULU 18.- La Xunta Xeneral d'asociaos, ye l'órganu supremu de gobiernu de l'Asociación y autoridá máxima y soberana de la mesma, constituyida polos socios con plenos derechos, siendo los sos acuerdos obligatorios y vinculantes pa tolos asociaos.

ARTÍCULU 19.- Les xuntas xenerales va presidiles el presidente de l'asociación o, na so ausencia xustificada, los vicepresidentes según orde. Va poder presidila tamién el presidente de la Xunta Xestora cuando nun hubiere Xunta Directiva.

ARTÍCULU 20.- Les xuntes xenerales podrán ser ordinaries o estraordinaries.- Les ordinaries celebraránse al menos una vez al añu ente'l 15 de xunu y el 15 de setiembre nel llugar del conceyu de Llangréu que se designe, y va presentase'l balance de les cuentes del añu anterior y de presupuestos pal añu siguiente. Les estraordinaries, cuando se convoquen, según los Estatutos en vigor. Los exercicios económicos van ser del añu natural.
Teniendo en cuenta que los miembros d'esta asociación van tara sitiaos en diferentes llugares del mundu, podrán utilizase les nueves tecnoloxíes de la comunicación (INTERNET-VIDEOCONFERENCIA) pa les xuntes.

ARTÍCULU 21.- Los alcuerdos adoptaos llegalmente en Xunta Xeneral van tener la fuerza d'obligar a tolos asociaos, incluyíos los non asistentes.

ARTÍCULU 22.- En cada Xunta Xeneral va llevantase un acta pol secretariu xeneral de l'Asociación na que recueya un resume de lo tratao, los acuerdos adoptaos y el resultáu de les votaciones si les hubiere. L'acta va esponese nos tablones d'anuncios de la sociedá y va publicase na páxina web de l'asociación (www.asturianosenelmundo.org) nun plazu máximu de 30 díes dende la so celebración y per un periodu nunca inferior a un mes dende que se ponga. El secretariu va poder emitir per escrito certificaciones de los puntos trataos nes xuntes xenerales a los socios con plenos drechos que lo solicitaran por escritu, too ello col vistu buenu del presidente de l'asociación.
Entiéndese que l'acta publicada según lo prescrito nesti artículu, lo mesmo que les certificaciones que nella tengan orixe van considerase definitives pa los terceros de buena fe nel periodu posterior a la so publicación d'acuerdu a los procedimientos marcaos pol artículu mentáu y hasta la so aprobación definitiva por parte la Xunta Xeneral.

ARTÍCULU 23.- CORRESPUENDE A LA XUNTA XENERAL:

1. Executar les inclusiones, omisiones y rectificaciones que puedan precisar estos Estatutos (Alcuerdos tomaos en Xunta Xeneral Estraordinaria).
2. Escoyer a quien deba presidir la sociedá( Elecciones, Xunta Xeneral estraordinaria)
3. Esaminar y aprobar nel so casu les actes, balances, cuentes y presupuestos que se presenten
4. Tomar cualquier resolución que perpase a la competencia del presidente o de la Xunta Directiva.
5. Acordar la disposición y trespasu de bienes u otres operaciones qu'afecten al patrimoniu la sociedá (Xunta Xeneral Estraordinaria)
6. Conceder títulu de socios d'honor.
7. Decidir sobre la disolución de la sociedá (Xunta Xeneral Estraordinaria)
8. En casu de nun aprobar dalgún de los apartaos anteriores, convocaráse XUNTA XENERAL ESTRAORDINARIA, nun plazu máximu de 30 díes. Na mesma y por mayoría ha decidise la solución más conveniente. La decisión tomada va ser irretrucable.

ARTÍCULU 24.- CONVOCATORIA Y ORDE DEL DÍA .
- Les convocatories pa Xuntes Xenerales, van comunicase a los asociaos con plenu drechu con 30 díes d'antelación a la fecha celebración prevista.

Na comunicación tien d'apaecer la fecha, hora y llugar en que tien de celebrase la Xunta Xeneral, amás del orde del día de la mesma. Tamién se colgará nel tablón d'anuncios oficial de la sociedá y na páxina web.

La Xunta Xeneral quedará válidamente constituyida en primera convocatoria cuando asistan a ella la metá más unu de los asociaos con plenos drechos y en segunda convocatoria cualquiera que seya'l númberu de socios con plenos drechos qu'asistan. Ente la primer convocatoria y la segunda, trescurrirá solamente media hora.

ARTÍCULU 25.- L'orde del día de la Xunta Xeneral Ordinaria, a mou enunciativu, podrá tener los siguientes puntos:

1. Llectura del orde del día
2. Llectura y aprobación, si procede, del acta o actes anteriores.
3. Presentación d'una memoria que contenga les actividaes feches pola Xunta Directiva nel añu, y les propuestes d'actividaes pal añu siguiente. movimientu de socios.
4. Llectura del dictame que presente la comisión revisora de cuentes sobre l'exerciciu acabáu.
5. Aprobación, si procede, de la xestión, cuentes y balances del exerciciu pasáu.
6. Presentación pa la so aprobación del presupuestu ordinariu pal exerciciu siguiente.
7. Escoyeta de tres asociaos titulares pa constituyir la comisión revisora de cuentes pal exerciciu siguiente.
8. Escoyeta de tres asociaos titulares pa constituyir la comisión de disciplina.
9. Llectura, discusión y votación de les mociones, enmiendes o proposiciones que presente cualquier asociáu, con plenos drechos. Too ello con una antelación de diez díes como mínimo y que la so propuesta nun venga contemplada como oxetu de Xunta Xeneral Estraordinaria.
10. Ruegos y Preguntes. Nesti apartáu nun se puen tomar acuerdos. Toa proposición firmada pol 10% de los asociaos y remitida al Presidente antes de la notificación prevista nel artículu 24, tien de ser incluyida nel orde del día de la Xunta Xeneral ordinaria.

ARTÍCULU 26.- Celébrase Xunta Xeneral Estraordinaria :

1. Cuando lo disponga la Xunta Directiva.
2. Cuando lo soliciten per escrito al menos un 20 % de los socios con plenos drechos, espresando les razones de la convocatoria. Esta Xunta Xeneral Estraordinaria, tendrá de celebrase nel plazu máximu de 30 díes dende la so solicitú. Nel orde del día tendrán d'incluise necesariamente los asuntos oxetu de la solicitú, qu'en nengún casu van poder ampliase, modificaos o sustituyíos polos Socios. Comunicaráse a los socios d'igual forma que lo especificao pa les xuntes xenerales ordinaries.
3. Pa escoyer al presidente de la sociedá, nos supuestos que prevén los estatutos
4. Pa facer inclusiones, omisiones o rectificaciones nos estatutos de la sociedá
5. Que se proponga la disolución de l'asociación.

ARTÍCULU 27- LOS ALDERIQUES
La Xunta Xeneral va presidila'l presidente de l'asociación, actuando'l secretariu xeneral como secretariu de la Xunta Xeneral a tolos efectos. En casu d'ausencia o imposibilidá del presidente, o de los vicepresidentes, la Xunta Xeneral escoyerá un presidente d'ente los presidentes. Tien de facese lo mesmo en casu d' ausencia del secretariu xeneral.
Los asociaos puen facese representar por otru asociáu na Xunta Xeneral mentando'l nome del representante y los sos poderes específicos. Pa ello mandará una carta al presidente al menos 5 díes enantes de la celebración de la Xunta Xeneral. Cada asociáu podrá representar solo a otru asociáu.
En Xunta Xeneral los alderiques tendrán de ser curtios, concediéndose la palabra a los asociaos por orde de solicitú. Pa la discusión d'una propuesta, cada asociáu dispondrá d'un solo turnu, en pro o en contra, pa esponer les sos idees al respective.
D'igual forma van tener drechu a usar la palabra por alusiones aquellos socios que, teniendo consumío o non el so turnu d'espresión, fueren claramente aludíos nel discutiniu

ARTÍCULU 28- Cuando la importancia del asuntu sometíu a alderique lo pida, a xuiciu de la Presidencia , podrá concedese unu o dos turnos más y les sos rectificaciones posibles.

ARTÍCULU 29- Nun consumirán turnu nos discutinios y podrán facer usu de palabra cuantes veces lo estimen conveniente, los miembros de la Xunta Directiva, cuando defendan actos o acuerdos de la mesma y los d'una ponencia de la que se tean sometiendo a discutiniu los informes.

ARTÍCULU 30- LES VOTACIONES - Les votaciones podrán ser ordinaries y nominales.
Entiéndese por votación ordinaria aquella na que se manifieste la voluntá de la Xunta por signos, aclamaciones o cualquier otra forma d'asentimientu. Los acuerdos siempre se tomarán en votación ordinaria, nun siendo que la tercer parte de los socios asistentes, que tengan drechu a votu, acordaren la votación nominal, o'l presidente lo dispunxere asina.
Nes votaciones a mano alzada, si la mayoría, en cualquier sentíu, fuera tan manifiesta que nun ficiere necesario'l recuentu pa conocer el resultáu exactu de la votación, se considerará tomáu l'alcuerdu por aclamación; teniendo drechu a facer constar el so votu en contra, o la so astención los asociaos qu'asina lo soliciten.
A pitición de la tercer parte de los asociaos presentes que tengan drechu a votu, la votación sedrá secreta. Esta fadráse depositando los asociaos les papeletes nuna urna. A esti efectu s'entregarán a los socios tres papeletes: una cola palabra “SÍ”, otra cola palabra “NON” y una tercera en blancu, pa que deposite aquella qu'esprese la so opinión. N'acabando la votación fadráse l'escrutiniu y el presidente anunciará'l resultáu del mesmu y proclamará l'alcuerdu tomáu. En casu d'empate, el presidente dispondrá d'un votu adicional.

ARTÍCULU 31- Toles decisiones que tengan de tomase en votación van ser por mayoría simple de los Asociaos presentes con drechu a votu, sacantes l'aprobación de la moción de censura o la reforma total o parcial de los estatutos y pa la disolución de la sociedá que va necesitar mayoría de dos tercios de los asociaos presentes y siempre y cuando participaren en tala xunta al menos la metá mas unu de los socios con drechu a votu.

ARTÍCULU 32- Les sesiones de les xuntas xenerales nunca van durar más de dos hores, pero puen allargase por acuerdu de la mayoría los asistentes con drechu a votu.

ARTÍCULU 33- Si nuna sola sesión nun s'acabare'l discutiniu y resolución de los asuntos sometíos a la Xunta Xeneral, suspenderáse esta pa la sesión o sesiones socesives, que se celebrarán dientro los ocho díes siguientes, sin perxuiciu de lo dispuesto na parte última del ARTÍCULU anterior.

CAPÍTULU II - EL PRESIDENTE

ARTÍCULU 34- El presidente de LANGREANOS EN EL MUNDO ye'l representante llegal de l'asociación a tolos efectos, va escoyese cada cuatro años según regulen los estatutos de l'asociación, y va tener les competencies que siguen:

1. Executar los alcuerdos de la Xunta Xeneral y de la Xunta Directiva.
2. Representar llegalmente a l'asociación en cualquier xurisdicción y en toles instancies, exerciendo toa clase d'acciones en defensa los drechos ya intereses sociales.
3. Dar poderes a procuradores y designar lletraos pa que representen y defendan a l'asociación ante los tribunales y organismos, too ello coles facultaes más amplies qu'en drechu se precisen.
4. Delegar les sos atribuciones nos vicepresidentes, con llibre revocación y reasunción del exerciciu plenu.
5. Actuar en nome de la sociedá y formalizar toa clase de contratos previo acuerdu de la Xunta Directiva.
6. Podrá decretar de forma preventiva la suspensión cautelar d'un sociu, dando cuenta d'ello a la Xunta Directiva.
7. Proponer a la Xunta Directiva y a la Xunta Xeneral los asuntos que considere amañosos pa la meyor marcha de l'asociación.
8. Presidir, aplazar y llevantar les sesiones de la Xunta Directiva y de la Xunta Xeneral, dirixendo los sos alderiques y resolviendo los empates col so votu de calidá.
9. Convocar les sesiones de la Xunta Directiva y proponer a esta la convocatoria de les xuntes xenerales ordinaries y estraordinaries.
10. Toes aquelles non reservaes espresamente a la Xunta Directiva o a la Xunta Xeneral y les qu'estos órganos-y deleguen.
11. Podrá adoptar les resoluciones que nun puen retrasase, de les que tendrá de dar cuenta na inmediata xunta de la Xunta Directiva.
12. Autorizará cola so firma, mancomunada cola del ayalgueru y la del vicepresidente primeru, tolos movimientos de fondos de l'asociación.
13. Suspender a cualquier emplegáu de la sociedá, cuando al so entender cometiere falta o faltes pa ello, poniéndolo en conocimientu de la Xunta Directiva pa la so resolución definitiva.
14. Solo se-y podrá quitar del cargu por una moción de censura.
15. En casu d' incapacidá o dimisión del presidente siguiráse'l procedimientu d'escoyeta marcáu nel artículu 53

CAPÍTULU III. XUNTA DIRECTIVA

ARTÍCULU 35- La Xunta Directiva ye un órganu colexáu de gobiernu, alministración y representación de l'asociación. Tien la facultá d'interpretar los estatutos, reglamentos y alcuerdos de la Xunta Xeneral y los suyos propios, cumpliéndolos y faciéndolos cumplir. En nengún casu va poder tomar alcuerdos que perxudiquen a los adoptaos con carácter xeneral o particular pola Xunta Xeneral y, si na interpretación de los mesmos s'escediera nes sos facultaes, quedará sin efectu cuando la propia Xunta Xeneral lo acuerde asina.

ARTÍCULU 36- La Xunta Directiva van constituyila'l presidente , dos vicepresidentes , un secretariu Xeneral , un ayalgueru y vocales , pudiendo ser nomaes por esta tamién, les comisiones, delegaciones y representaciones que se consideren afayadices pal meyor cumplimientu de les sos funciones.

ARTÍCULU 37- Tos estos cargos van ser honoríficos, nun se percibirá por ellos recompensa económica nenguna nin tampoco nun podrán realizar trabayos pa l'Asociación polos que se saque provechu económicu.

ARTÍCULU 38- La Xunta Directiva cuidará la organización de cuantes actividaes se celebren, y establecerá toa clase medios, pa poner en marcha aquelles actividaes culturales, deportives y recreatives que seyan necesaries pal meyor cumplimientu los fines sociales, redactando y publicando, si fuera preciso, les bases o reglamentos correspondientes.

ARTÍCULU 39- Al tar espardíos per tol mundu los miembros d'esta asociación, van utilizas les nueves tecnoloxíes (INTERNET), pa la celebración de les xuntes. La Xunta Directiva va xuntase al menos una vez al mes, y siempre que lo estime oportuno'l Presidente o lo soliciten, como mínimo, la cuarta parte los sos componentes. La convocatoria les sesiones de la Xunta Directiva corresponderá al presidente, y tendrá de notificase con 48 hores, al menos, d'antelación, sacante casos d'urxencia, acompangada del orde del día. Quedará, sicasí, válidamente constituyida la Xunta Directiva anque nun se cumplieren los requisitos mentaos pa les convocatories, si asisten tolos miembros y lo acuerden asina por unanimidá.

Va tar facultada p'aldericar y tomar alcuerdos siempre qu'asistan a ella en primer convocatoria la metá mas unu los sos miembros y en segunda convocatoria, pasaos trenta minutos, un terciu los mesmos. Los alcuerdos de la Xunta Directiva van tomase por mayoría simple de votos. En casu empate, va ser decisivu'l votu'l presidente. Los votos contrarios al alcuerdu tomáu o les astenciones motivaes llibrarán de les responsabilidaes que pudieren derivase, nel so casu, de los alcuerdos de los órganos colexaos.

ARTÍCULU 40- Lo mesmo a les xuntes de la Xunta Directiva qu'a les de les secciones, comisiones, delegaciones o representaciones, podrán asistir, si son convocaos pa ello, los asesores que se considere oportuno pa informar de los asuntos que correspuendan a los sos llabores respectivos. Van tener voz pero votu non.

ARTÍCULU 41- Los miembros de la Xunta Directiva tienen la obligación d'asistir a les sos xuntes previamente convocaes. L'ausencia a cuatro d'elles consecutives, sin avisu o xustificación previa, va entendese como renuncia al so cargu.

ARTÍCULU 42- En casu d'ausencia, dimisión, renuncia o revocación de dalgún miembru de la Xunta Directiva, el presidente va designar a cualquier otru vocal suplente, dando cuenta d'ello a la Xunta Directiva na so próxima xunta, y a la Xunta Xeneral na siguiente xunta de carácter ordinariu.

ARTÍCULU 43- Los miembros de la Xunta Directiva nun van poder ocupar nengún cargu directivu nin técnicu n'otres entidaes u organismos que tengan los mesmos fines que l'asociación, sacantes los que pola so condición de representante de la sociedá-yos puedan corresponder.

ARTÍCULU 44-

a) Les funciones y facultaes de los miembros de la Xunta Directiva son les que siguen:

1. Nomar y separar a tolos emplegaos de l'asociación, esistiendo previamente espediente pal casu.
2. Sicasí, la dotación señalada nel presupuestu pa los emplegaos que nun se pue cambiar nel añu pal que tea definida, nun siendo por disposiciones oficiales, la Xunta Directiva pue acordar el dar gratificaciones estraordinaries.
3. Aprobar los contratos alministrativos que tenga de celebrar l'asociación.
4. Disponer que se lleve la contabilidá d'acuerdu col sistema oficial en vigor.
5. Realizar cuantes reformes seyan convenientes pa l'asociación, siempre que nun vayan contra estos estatutos.

b) Los Vicepresidentes : Correspuende a los mesmos collaborar col presidente y sustituyilu en toles sos funciones y facultaes, cuando seya necesario por causa d'enfermedá, ausencia, delegación, incompatibilidá o cualquier otra imposibilidá física o llegal. Estos cargos nun son compatibles con cualquier otra función dientro la Xunta Directiva.

c) El Secretariu Xeneral.- Correspuende al Secretariu Xeneral:

1. Convocar na forma establecida a los socios pa les xuntes xenerales y a los miembros de la Xunta Directiva pa les xuntes d'ésta, preparando l'orde del día y asuntos pa tratar.
2. Redactar les actes y certificar los alcuerdos tomaos, tanto de les xuntes xenerales, como de les xuntes de la Xunta Directiva.
3. Facer que se lleven los llibros de rexistru ya inscripción de socios que se necesiten pal mayor orde y claridá de tan importante serviciu.
4. Tener al so cargu'l rexistru, archivu y custodia de la correspondencia de l'asociación.
5. Tener al so cargu'l sellu y tolos documentos que correspuendan a l'asociación.
6. Dar cuenta al presidente puntualmente de toles comunicaciones, instancies, piticiones ya incidencies que se reciban na asociación.
7. Redactar les memories añales y asesorar a la Xunta Directiva en tolos asuntos llegales y alministrativos.
8. Nel casu de necesitar la collaboración de personal esternu pagao, pol volume de trabayu, esti va tar al so cargu y dirección.

d) L'Ayalgueru- Correspuende al ayalgueru:

1. Intervenir nel movimientu fondos, tomando razón de tolos xustificantes de pagos, qu'autorizará cola so firma xunto a la del presidente y la del vicepresidente primeru. La firma los talones bancarios fadráse de forma mancomunada cola firma del ayalgueru, presidente y vicepresidente primeru.
2. Preparar la formación de presupuestos, cuentes, inventarios y balances, amás de la xestión d'habilitación de los mesmos.
3. Llevar la contabilidá de la sociedá.
4. Ellaboración del estáu económicu mensual de la sociedá, indicando los medios que considere amañosos p'ameyorala.
5. Custodiar los fondos de la sociedá, dando cuenta al presidente y demás órganos colexaos de los asientos contables.

e) Responsable de Rellaciones Institucionales y comunicación . Correspuénde-y el fomentu de les rellaciones ente l'asociación y cualquier órganu de l'alministración local, autonómica, nacional o internacional con vistes a consiguir los oxetivos de l'asociación descritos nestos estatutos y la promoción de l'asociación. Actúa baxo les órdenes ya instrucciones del presidente

f) Los Vocales.- Son los demás miembros de la Xunta Directiva que tienen como misión la de cooperar por igual na xestión xeneral de la sociedá, desempeñando los cometíos qu'específicamente-yos encargue'l presidente o la propia Xunta Directiva.

g) Los Asesores : Miembros de la Xunta Directiva que participen na mesma aportando los sos conocimientos sobre aspectos específicos de la vida asociativa o de los oxetivos de l'Asociación. No que cinca a la so responsabilidá y atribuciones van ser asimilaos a vocales. Responderán ante'l presidente y/o la Xunta Directiva sobre los cometíos que se-yos asignen en virtú de la materia de la so competencia.

ARTÍCULU 45.- La Xunta Directiva, amás d'al presidente y al ayalgueru, previo alcuerdu, podrá conceder poderes pa casos concretos y determinaos a otru u otros miembros de la mesma.
Les firmes llegales necesaries pa disposición de fondos van ser dos firmes mancomunaes de cuatro responsables, los que siguen: presidente, secretariu, ayalgueru y responsable de rellaciones institucionales.

ARTÍCULU 46.- Les secciones, comisiones, delegaciones o representaciones van mandase en tou momentu al traviés de les directrices marcaes pola Xunta Directiva. D'elles va formar parte, amás del presidente, al menos el vocal de la Xunta Directiva, y tamién otros socios que nome la Xunta Directiva, col envís de collaborar nesa actividá concreta.

TÍTULU CUARTU     Escoyeta de los Órganos de Gobiernu

CAPÍTULU I. XUNTA XESTORA

ARTÍCULU 47.- La Xunta Xestora ye un órganu de dirección de l'asociación que de forma provisional, exerce la función d'iguar situaciones trensitories derivaes d'un vacíu de poder, por dimisión o votu de censura al presidente. Les sos atribuciones van tar llendaes, de mou esclusivu, al cumplimientu de les obligaciones económiques normales de la mesma y al despachu de los asuntos de trámite pa cumplir los plazos señalaos de la convocatoria d'elecciones.

ARTÍCULU 48.- La Xunta Xestora van formala como máximu:

1. Los ex-presidentes de l'asociación.
2. Tres ex-directivos
3. Tres socios con más de dos años d'antigüedá.
4. Los que fueren sancionaos con faltes graves o mui graves y nun hubiera prescrito la falta nun van poder ser miembros de la Xunta Xestora.
5. Toos ellos van ser escoyíos por sortéu na primer Xunta Xeneral dempués de les elecciones.
6. Va presidila'l miembru de más edá presente de la Xunta Xestora y los alcuerdos han tomase por mayoría de los miembros presentes.
7. Van tar asistíos pol miembru qu'escueyan, que va llevantar acta de toles xuntes y va trescribiles al llibru actes de xuntes xenerales de l'Asociación.

Nos casos d'urxencia, podrá tomar midíes cautelares y urxentes sobre asuntos qu'afecten a la sociedá, dando cuenta al nuevu presidente una vez escoyíu.

CAPÍTULU II. ESCOYETA DE PRESIDENTE Y XUNTA DIRECTIVA

ARTÍCULU 49.- El mandatu'l presidente va tener una duración de cuatro años. Son escoyibles pa presidente los asociaos titulares o fundadores a la fecha la escoyeta.

ARTÍCULU 50.- El candidatu a presidente tendrá de presentar xunto cola candidatura la composición de la so Xunta Directiva.

ARTÍCULU 51.- La escoyeta'l presidente tendrá llugar na Xunta Xeneral que se celebre nel cuartu añu del so mandatu. Se exceptuarán les elecciones anticipaes que se celebrarán dientro de los cuarenta y cinco díes siguientes al fechu motivador de les mesmes, y la posibilidá establecida nel párrafu final del artículu 34.

ARTÍCULU 52.- Celebraránse elecciones anticipaes por dimisión o moción de censura al presidente y Xunta Directiva.

ARTÍCULU 53.- Escoyeta Presidente
Les elecciones a presidente de l'asociación van ser convocaes cada cuatro años y na 1 er quincena del mes d'abril del últimu añu mandatu.

En casu de ser por motivu de dimisión o votu censura del Presidente entrará en funciones la Xunta Xestora, que convocará elecciones nel plazu d'ocho díes como máximu, y entregará les competencies a la Xunta Electoral pal desarrollu de les elecciones.

La convocatoria elecciones comunicaráse pela vía postal o per corréu electrónicu a tolos socios, poniendo nos tablones d'anuncios de la sociedá, y na páxina web una llista actualizada de socios con drechu a votu, onde apaeza, amás del númberu, nome, apellíos y la fecha d'alta del asociáu.

Tolos socios van poder solicitar modificaciones o rectificaciones a los datos espuestos na llista socios nun plazu de quince díes dende la so publicación.

Les candidatures presentaránse con 15 díes d'antelación y si'l candidatu axunta les condiciones esixíes pa ser presidente, se pondrá nel tablón d'anuncios de l'asociación. De nun haber más qu'una candidatura presentada en tiempu y forma reglamentaria, nun habrá votación, y marcaráse la proclamación de la candidatura presentada.

La votación pa la escoyeta fadráse de forma secreta, depositando cada elector una papeleta col nome'l candidatu o en blancu, saliendo escoyíu'l candidatu col mayor númberu votos.

TÍTULU QUINTU     Patrimoniu y réxime d'alministración

CAPÍTULU I. PATRIMONIU

ARTÍCULU 54.- El patrimoniu de LANGREANOS EN EL MUNDO ye'l conxuntu los terrenos y locales de los que seya o pueda ser titular, amás de tola ferramienta, maquinaria, moblame, enseres y tolos demás bienes y drechos qu'integren el so activu.

ARTÍCULU 55.- Los recursos de l'Asociación son:

1. Les cuotes sociales ordinaries llegalmente marcaes.
2. Les cuotes d'inscripción de nuevos socios, aprobaes en Xunta Xeneral.
3. Cualquier otra cuota que con carácter estraordinariu marque la Xunta Xeneral.
4. Los ingresos xeneraos por cursos, utilización temporal d'instalaciones, publicidá u otros conceptos y servicios que llegalmente puedan establecese na sociedá.
5. Les subvenciones ordinaries o estraordinaries que se consigan d'entidaes públiques o privaes.
6. Les herencies, cesiones o donaciones que-y concedan.
7. Les rentes de bienes inmuebles y de los valores de la so cartera, intereses de cuentes corrientes y depósitos bancarios y productos de tresferencia de bienes consiguíos con recursos propios.
8. Los frutos, rentes ya intereses de los sos bienes patrimoniales.
9. Los préstamos o créditos que se-y concedan.
10. Los demás recursos que puedan consiguir dientro les disposiciones llegales.

CAPÍTULU II. RÉXIME DOCUMENTAL Y CONTABLE

ARTÍCULU 56- El réxime documental y contable de l'asociación va ser:

1. El rexistru asociaos.
2. El rexistru actes que reflexará per escrito les xuntes que celebren la Xunta Xeneral, la Xunta Directiva y los demás órganos colexaos de l'Asociación, con espresión, al menos, de la fecha, asistentes, asuntos trataos y alcuerdos tomaos. Les actes sedrán siempre soscrites pol presidente y el Secretariu Xeneral
3. Los rexistros contables nos que figurarán tolos ingresos y gastos de la sociedá, debiendo precisase la procedencia d'aquellos y la inversión o destín d'éstos.
4. La Xunta Directiva tien de tener formalizao'l balance de situación y les cuentas d'ingresos y gastos, referíos al exerciciu anterior y que pondrá en conocimientu de tolos socios dando amuesa d'ellos nel tablón d'anuncios y na páxina web, al menos con quince díes d'antelación a la fecha de la Xunta Xeneral Ordinaria.

ARTÍCULU 57.- Los servicios alministrativos y de contabilidá llevaránse na secretaría de la sociedá, siguiendo les instrucciones y alcuerdos del presidente y los demás órganos de gobiernu de l'asociación. En casu de necesidá podrá dotase del personal necesario.

CAPÍTULU III. LA COMISIÓN REVISORA DE CUENTES

ARTÍCULU 58.- La Xunta Xeneral nomará a tres socios de la entidá pa formar la comisión revisora de cuentes, que revisará les cuentes de la mesma y emitirá informe a la Xunta Xeneral.

TÍTULU SESTU     Disposiciones Finales

CAPÍTULU I. PROCEDIMIENTU DE REFORMA DE LOS ESTATUTOS

ARTÍCULU 59.- La reforma total o parcial destos estatutos esixe l'alcuerdu de les dos terceres partes de los asistentes que tengan drechu a votu, en Xunta Xeneral Estraordinaria, convocada espresamente con tal envís, teniendo de publicase nel tablón d'anuncios y na páxina web de la sociedá, el tenor lliteral íntegru de les modificaciones propuestes, pel plazu d'un mes.

CAPÍTULU II. DISOLUCIÓN DE L'ASOCIACIÓN

ARTÍCULU 60.- Cuando circunstancies imprevistes aconseyen la necesidá de disolver l'Asociación, la Xunta Directiva convocará Xunta Xeneral Estraordinaria, espresando l'alcuerdu de la convocatoria.

ARTÍCULU 61.- Si la Xunta Xeneral acuerda que procede la disolución, esta van tener que ratificala les dos terceres partes, pelo menos, de los socios presentes, convocaos espresamente al efectu, conforme al procedimientu acordáu pa les xuntes xenerales estraordinaries.

ARTÍCULU 62.- Nel casu de que s'acuerde la disolución de l'asociación, según l'artículu precedente, les propiedaes, muebles ya inmuebles que tenga l'asociación, van distribuyise d'acuerdu a lo que se decida na Xunta Xeneral a suxerencia de la Xunta Directiva en funciones, DANDO PRIORIDÁ a instituciones de carácter benéficu o asociaciones colos mesmos fines que LANGREANOS EN EL MUNDO.

LA XUNTA XESTORA
El Secretariu:            Dionisio Fernández Díaz
Vu Bu El Presidente:    Florentino Martínez Roces
Vocal:                      José Antonio Blanco Ortiz